Sankashti Ganesh Chaturthi & Ekadashi
Sankashti Ganesh Chaturthi & Ekadashi ka upwaas karne se milti hai mann ko shanti aur Bhagwan ka ashirwad.
Aaz hogi Bhakt se Bhakt ki baat :
Jab jeevan me uljhan (Samasya) badh jaati hai, mann heavy ho jaata hai, aur har taraf se pareshaniya mehsoos hoti hai… tab hamesha ye yaad rakhe ki bhagwan hamesha hamare pass hi hai.
Sankashti Ganesh Chaturthi aur Ekadashi aise hi pavitra din hain, jo sirf vrat nahi, balki atma ko shaant karne ka avsar hote hain. Aaj main aapse koi gyaan nahi baant raha, bas ek bhakt ke dil se nikli baat aapke dil tak pahunchane ki koshish kar raha hoon.
Sabse pehle hum jaanenge Sankashti Ganesh Chaturthi ko :
Har Sankat ka Ant “Sankat hare Ganesh” – ye sirf shabd nahi hain, ye ek anubhav hai. Sankashti Chaturthi har mahine ki Krishna Paksha ki Chaturthi ko aati hai. Is din Ganpati Bappa ki pooja ki jaati hai, jo har rukawat ko door kar dete hain.
Sankashti ka asli arth :
Dukh se mukti, chinta se azaadi. Jab hum sachche mann se Bappa ko yaad karte hain, to mann halkapan mehsoos karta hai. Chahe naukri ki tension ho, health ka darr ho, ya parivaar ki chinta – Ganpati ji dheere se sab chintao ki har lete hai.
Sankashti vrat ka bhav :
-Sankashti vrat ka bhav me Din bhar vrat rakha jaata hai.
-Shaam ko Chand ko dekhker vrat khola jaata hai.
-Ganesh ji ko durva, modak ya simple prasad chadhaya jaata hain.
Is vrat me kathin niyam nahi hote, isko sirf shraddha aur vishwas se karna hota hain. Agar poora vrat na bhi ho paaye, to koi paap nahi. Bappa bhav dekhte hain, bhookh nahi.
Ab Janenge Ekadashi Vrat ke baare me :
Ekadashi – Ye hota hain -Mann aur Atma ka Upvaas.
Ekadashi aati hai har mahine, aur ye din hota hai Bhagwan Vishnu ka din. Par Ekadashi sirf khaane se door rehna nahi hai. Ye din hai –
👉 Galat soch se upvaas.
👉 Gusse se upvaas.
👉 Negative energy se door rehna.
Ekadashi ka shant asar :
Ekadashi ka Vrat Karne se Mann shaant ho jaata hai, Neend achhi aati hai, Soch positive hoti hai Bhagwan Vishnu ke naam ka jaap karte hue lagta hai jaise jeevan thoda slow aur Shant ho gaya ho.
Jab Sankashti aur Ekadashi paas-paas ho :
Kabhi-kabhi Sankashti Ganesh Chaturthi aur Ekadashi ek hi hafte me aa jaati hain. Ye bahut pavitra samay hota hai.
Ganpati ji rukawat door karte hain aur Vishnu ji jeevan ko sahi disha dete hain. Aise samay me agar aap thoda kam bole, thoda zyada naam jap kare aur mann se shikayat kam kare to vishwas rakhiye, aapka bhav bhagwan tak zarur pahunchta hai.
Har koi lamba vrat ya poori pooja nahi kar paata aur bhagwan ye jaante hain.
Aap bas itna kar lijiye: Subah ya shaam ek deepak jalao 5 minute aankh band karke naam lo Dil se bolo – “Hey Prabhu, sambhal lena.” Bas. Itna kaafi hai .
Bhakti ka phal kab milta hai? Ye sawal sabke mann me aata hai?
Bhakti ka phal Bhagwan turant nahi, sahi samay par dete hain.
- Kabhi dukh kam karke.
- Kabhi himmat badha kar.
- kabhi galat raaste se hata kar.
- Aur kabhi… sirf mann ko shaant karke.
🙏 Ant me ek bhakt ki prarthna-
Ganpati Bappa aapke har sankat ko door karein aur Bhagwan Vishnu aapke jeevan ko sthir aur pavitra banayein, Aap jahan bhi ho, jaise bhi ho – Bhagwan aapke saath hain.
Shraddha rakhiye, bhakti banaye rakhiye, aur apne mann ko pavitra rakhiye , sab thik hoga.
🌸 Ganpati Bappa Morya -Hari Om 🕉️”
Dosto Aasha karta hu aapko ye blog aur isse judi sabhi jaankari achchchi lagi hogi, agar iss blog ne aapki jara bhi help ki ho toh please apne dosto rishtedaaro me bhi iss blog ko share karey taaki sab tak Sanatan Gyan pahuche.
Jai Shree Ram- Jai Hanuman.
About author
Add comment